كنت زمان بقول ايه البنات اللي بتتجوز في السن الصغير ده ؟
بصراحة كنت بتريأ عليهم .. لحد ما وصلت لل 20 و قررت اني احب و اتخطب و اتجوز .. و عرفت ليه ممكن بنت تضحي بحريتها من خروج و فسح و تنطيط و عدم مسئولية .. لحياة مليانة ضغط و مسئولية و التزام .. عشان حاجة واحدة بس .. عشان لقت اللي كانت بتدور عليه و اللي كل البشر بتعيش حياتها تدور عليه ... لقت الاحساس بالامان ❤😍

اتجوزوا بدري لما تلاقوا الشخص اللي معاه انتوا في امان مش خايفين من بكره معاه .. مش عارفين هتواجههوا ايه بس عارفين انكوا مع بعض اكيد هتغلبوا ..

الشخص اللي اختارتيه بكامل قواكي العقلية و مقتنعة بيه تماما ... اللي شبهك في تصرفاتك و ردود افعالك .. اللي دمه من دمك و روحه من روحك اللي تحسي ان ربنا اخد ضلعك من جمب قلبه ف بقي سند ليكي و زرع احترامك و حبه ليكي في قلبه ف بقيتوا روح واحدة في جسدين ..

الشخص اللي عيلته شبه عيلتك و اللي بيته شبه بيتكم .. الشخص اللي تحبي عيوبه و تقبليها مش اللي بتعديهاله بالعافية .. و اللي لو حاجة مش عاجباكي فيه مبتتكسفيش تقولهاله و هو بيحاول يغير الحاجة دي عشان ميضايقكيش بيها ..

الشخص اللي لما تقعدي معاه تتبسطي و تفرحي .. ببساطة تحسي بامان في حضنه و لما تحسي صوت نفسه جمبك تطمني ..
اللي لما يهزر قلبك يرقص من جواكي .. اللي لما تتكلمي قدامه عينه تلمع من الفرحة بيكي ❤

اتجوزي الشخص اللي مستعده تعيشي معاه علي الحلوه و المره و المره بالذات ..
الشخص اللي منغيره مش بتعرفي تتنفسي بتتخنقي ... مش الشخص اللي بتنفسي معاه لانك من السهل تتبسطي مع كتييير و تتنفسي مع كتير بس من الصعب انك تلاقي الشخص اللي تتخنقي من غيره .. تتعبي و هو مش موجود معاكي ..

اتجوزي الشخص اللي يديكي قيمتك و يحبك حب انتي نفسك شايفه انه اكتر من اللي انتي تستاهليه .. اللي يحسسك انك تستاهلي اكتر من اللي بيعمله عشانك .. اللي يحسسك دايما انك ملكة متوجة علي كل ممالك الارض .. اللي عيونه بتلمع معاكي و معاكي انتي و بس .. اللي دايما و ابدا فرحان بنجاحك و بيقودك للافضل .. اللي دايما بتنجحي وانت معاه .. اللي بيرفعك و يعليكي .. اللي شايفك كبيرة اوي في نظره .. اللي دايما واقف في ضهرك مهما حصل ..اللي تحسيه بيساعدك توصلي لاهدافك و أحلامك ... اللي لو متخانق معاكي و حد هاوب نحيتك ياكله و ميهمهوش انكوا متخاصمين .. اللي لو طلعتي عليه غضبك و قرفك تحسيه بياخد الدبش منك و يقلك قولي براحتك مش هسيبك الا وانت تمام ..

اللي دايما حاسس بيكي بحزنك و فرحك .. اللي حاسس انك انسانه و ليكي مشاعر .. اللي سايبلك حريتك وواثق فيكي .. اللي بيفهم نظرتك ، صوتك ، روحك لو شايلة هم .. الشخص اللي في بينكم رموز و حركات و نظرات محدش بيعرف يفك شفرتها غيركم ..

الشخص اللي وجوده "هدف" في حياتك اللي كان نفسك يكمل معاكي مشوارك .. مش اللي وجوده مجرد "صدفة" في حياتك عدت ولا عريس و السلام ..
اللي ميكونش سد خانة او ملي فراغ او مجرد جوازه وخلاص او اهو ضل راجل ولا ضل حيطة .. لأ اللي يكون حبيبك و صاحبك و ابنك و جوزك و ابوكي و اخوكي ..

الشخص اللي ايده لما تطبطب عليكي تحسيها احن من ايدك عليكي ... و لما يعلمك الصح بعقاب بسيط هدفه انك تبقي كاملة مش عشان يذل فيكي .. و تحسي عقابه ضربه خفيفة مش كرباج يقطم ضهرك ...

الشخص اللي لما تزعلوا من بعض حياته بتقف .. مش هقولك ان في علاقة من غير مشاكل و قلق بس في حد بيفرق معاه زعلك .. حد بيتضايق لما يضايقك حتي لو انتي غلطانه .. حد يأنب نفسه انه زعلك .. حد يومه بيتأفل لما متكلميهوش ... حد بيحب يعاتبك حتي لو بيكره العتاب عموما عشان ميبقاش شايل منك و تتصالحوا .. الحد اللي ليكوا قعدة مع بعض مرة كل كام زعلة تتعاتبوا فيها و تعيطوا و تنتهي بحضن و متزعليش ...
حد باقي عليكي اوي و هماه في حياته و يومة من غيرك ناقص ..

الشخص اللي شايف حياته قبلك متسويش يوم واحد معاكي و حياته معاكي كملت بيكي .. اللي شايفك كاملة حتي و انتي مليانة عيوب ..
الشخص اللي يحبك لنفسك مش عشان فيكي و فيكي ..

من الاخر محدش يستاهل يعيش في جنتك غير اللي شايفك ملاكه .. 😍

و عشان كل دا انا قررت اني اتدبس بكره تدبيسة العمر كله  .. 😉😍
شكرا انك موجود دايما في حياتي حبيبي 😍
ربنا يبارك بيتنا و حياتنا و يخليك ليا ❤

باقي اقل من 24 ساعة و ابقي لبست معاك العمر كله 😍😍